طلع روحك.. الرياضية!

ستاد القاهرة/

مباراة مصيرية -كالعادة- بين الأهلي والزمالك

[ندعوك للتسجيل في المنتدى أو التعريف بنفسك لمعاينة هذه الصورة]

الجمهور محتشد في المدرجات يرفع الأعلام البيضاء
والحمراء، وكل فريق منهم يردد هتافات خاصة مهذبة لائقة تحترم مشاعر الفريق
الآخر.. حتى شوف..

" (.............) يازمالك"

"(..............) يا أهلي"

"آه ياني آه ياني آه ياني.. الزمالك طول عمره التاني"

"ماتقولشي يمين ولا شمال.. ياحلاوة الأهلى بتلاتة الهلال"

"ياللا ياللا ياللا.. الزمالك بيخسر جوه وبره"

"هوبا هوبا هوبا.. فضيحة الأهلي وصلت أوروبا"

وبعد أن أطلق الحكم صافرة البداية بدقيقة واحدة
فقط.. يحرز الأهلي هدف التقدم فتهتف جماهيره سعيدة وتبدأ جماهير الزمالك
في إطلاق الشتائم والسباب للاعبي الأهلي كل واحد باسمه؛ لأنه "إزاي يعني
يجيبوا جون في الزمالك"، قبل أن يحرز الزمالك هدف التعادل فتهتف جماهيره
وتهلل سعيدة مبتهجة وتتحول جماهير الأهلي إلى إطلاق الشتائم والسباب
للاعبي الزمالك كل واحد باسمه؛ لأنه "إزاي يعني يجيبوا جون في الأهلي"..

وبعد أن تتبادل الجماهير كل مالذ وطاب من شتائم
جديدة ومبتكرة وينسون في وسط هذا الحماس الرهيب أن يشجعوا فريقهم تنتهي
المباراة بالتعادل..

وتخرج الجماهير وقد سن كل واحد فيهم أسنانه
استعدادا للمعركة القادمة..فين؟ في القهاوي والشوارع وفي البيوت والشغل
والجامعة .. ده أنت غريب قوي!

***

ع القهوة

[ندعوك للتسجيل في المنتدى أو التعريف بنفسك لمعاينة هذه الصورة]

يجلس "حسونة" مرتديا فانلة الزمالك البيضاء
وهو يمسك في يده كوبا من الشاي ويقول لأصدقائه بأعلى صوته حتى يسمع جاره
في المقهى "عوضين":
"هع هع هع.. بس قطعناهم في الماتش.. أنا
أصلا مش عارف الأهلي ده بيلعب كورة ليه.. آه ممكن يلعبوا سلة.. يد..
طايرة.. أي حاجة.. إنما الكورة دي مايصحش يلعبوها خالص.. ياعم دي فرقة
خسرت من الهلال السوداني بالتلاتة.. يبقى المفروض يلعبوا بلي أحسن.. هع هع
هع.. آه والله بلي مسافات طويلة هع هع هعهوع!"



يقف
"عوضين" منفعلا في قلب المقهى وهو يمسك في يده اليمنى بزجاجة مياه غازية
قبل أن يقول لرفاقه الملتفين حوله وقد ارتدوا فانلة الأهلي الحمراء
المميزة:
"والله ياجدع الواحد مش عارف هي ليه القرعة -القرعة
واخد بالك- بتتباهى بشعر بنت عمة أبوها.. يعني ياريت حتى بنت أختها..
والله فرقة الزمالك دي صعبانة عليّ.. تحس إن جماهيرها مولودين ياعيني
وعندهم عقدة نقص.. وبعدين موضوع الستة واحد ده عامل لهم برضه "تربنة في
الاستبحس"... هعهع هوو لعلعلع.. آه والله في الاستبحس.. بيتهيألي المفروض
الزمالك يبطل يلعب كورة ويد وسلة.. وبلي كمان ويلعب بقى في مناخيره.. أي
والله مناخيره.. والخوف أحسن ياخد المركز التاني برضه.. هعهع..هوع هوع!"



المشهد
بعد ذلك معروف.. كلمة من "حسونة" على كلمة من "عوضين".. شتيمة من هنا على
لكمية من هنا.. هوبا.. كرسي في الكلوب.. خناقة.. طاخ طيخ طوخ.. طراخ..
الأهلي حديد.. يازمالك يامدرسة!

***

لغاية وقتنا هذا لم يتفق الجميع على هوية الشعب أو البلد أو الشخص اللي اخترع كرة القدم..

فيه اللي بيقول إنهم الصينيين وفيه اللي بيقول
إنهم لأ دول اليونانيين وفيه اللي بيأكد على أنهم الرومان.. وفيه اللي
بيحلف برأس جده أنهم الفراعنة..

عموما لو اختلفنا على مين اللي اخترع الكورة..

أكيد مش هنختلف على أن التشجيع اللي بيحصل في مصر ده

أكيد أكيد ملهوش أي علاقة بالكورة!

[ندعوك للتسجيل في المنتدى أو التعريف بنفسك لمعاينة هذه الصورة]

مخترع كرة القدم أياً كانت جنسيته..

كان يهدف من اختراعه ده لتقريب الناس والشعوب من خلال اللعب والتنافس..

وأكيد عمره ماتصور أن كرة القدم أصبحت
سببا للفرقة والتشاحن والاختلافات والخناقات وربما الحروب كمان مش بس بين
الشعوب وبعضها البعض لأ ده بين الشعب الواحد اللي بيتكلم لغة واحدة
وبتحكمه ثقافة وعادات وتقاليد واحدة.. كل ما هنالك بس أن فيه جماعة منهم
لابسين فانلة حمرا والتانيين لابسين فانلة بيضا!



لو مش مصدقنا

اتفرج على أي ماتش كورة فيه الأهلي أو الزمالك وحتى مش لازم يكون الفرقتين بيلاعبوا بعض..



لما يخسر الأهلي من أي فرقة حتى لو كانت أجنبية هتلاقي أول ناس فرحانين ومبسوطين بده هم كتير من من جمهور الزمالك..



ولما يخسر الزمالك من أي فرقة حتى لو كانت من كوكب المريخ برضه هتلاقي أول ناس فرحانين ومبسوطين بده هم كتير من من جهور الأهلي..

ده اسمه شماتة وتشفي وتمني السوء للغير سيادتك..

[ندعوك للتسجيل في المنتدى أو التعريف بنفسك لمعاينة هذه الصورة]

أيوه اسمه كده وملهوش أي اسم دلع تاني وده شيء غريب جدا.. وسلوك أكيد له تأثير على باقي سلوكيات الناس في المجتمع الواحد..



يعني ممكن الشماتة والتشفي ده ينتقل من الرياضة- وهو أكيد اتنقل أصلا- إلى باقي تفاصيل الحياة اليومية..



ويمكن ده سبب من أسباب تفسخ -حلوة تفسخ دي!- المجتمع المصري دلوقت.. وأنه
مافيش حد قلبه على حد.. وأنه الأغلبية كل همها أن الخير يكون ليها وبس..
يولع بقى الناس التانيين!



جايز أنت شايف كلامنا كبير وإننا محبكينها قوي.. مش عارف إيه دخل الكورة في علاقات الناس وبعضيها.. وإيه اللي جاب القلعة جنب البحر..

حقك برضه..

بس لو مختلف معانا قل لنا..

ولو متفق معانا قل لنا برضه

ليه العلاقة بين جماهير ومحبي كرة القدم في مصر

وخاصة بين جماهير الأهلي والزمالك..

وحشة كده وماليها -في الأغلب- كراهية وتشفي؟



إيه السبب في ده؟

[ندعوك للتسجيل في المنتدى أو التعريف بنفسك لمعاينة هذه الصورة]

وقول لنا إزاي نقدر نقاوم السلوك ده

وتكون هناك روح رياضية بجد بين الناس

بدل ماهو كده بيطلعوا روح بعض!

وماتنساش تكتب رأيك